Rana Plazako tragediaren 11. urteurrenean, dozenaka pertsonak kale ekintza bateratua egin dute Gasteizen, Iruñean, Bartzelonan, Granadan eta Madrilen, Decathloni eta Tendam taldeari (Cortefiel, Women’secret, Springfield, Pedro del Hierro) ehungintzako langileak babesteko Nazioarteko Akordioa sina dezatela eskatzeko.
SETEM Hego Haizeak, Arropa Garbia Kanpainaren barruan, kale ekintza bat egin du gaur arratsaldean Gasteizko hiriguneko Decathlon, Cortefiel eta Women’secret dendetan. Bertan, erreklamazio-orri ugari helarazi dizkie marka horiei, Ehungintza eta Jantzigintza Industriako Osasunerako eta Segurtasunerako Nazioarteko Akordioa sina dezaten eskatzeko.
Arabako hiriburuan ez ezik, Iruñean, Bartzelonan, Granadan eta Madrilen ere egindako ekintza bateratua izan da, Bangladeshko Rana Plaza eraikineko tragediaren 11. urteurrenean; 2013ko apirilaren 24an, 1.138 pertsona hil ziren bertan.
Dozenaka lagunek parte hartu dute bost hiri horietan antolatutako protestetan. Salatu dutenez, Decathlon enpresak eta Espainiako Tendam taldeak (Cortefiel, Women’secret, Springfield, Pedro del Hierro) ez dutela Nazioarteko Akordioa sinatu, dagoeneko mundu osoko 200 konpainiak baino gehiagok sinatu duten arren.
Protesta horren bidez, Arropa Garbia Kanpainak herritarrak animatu nahi ditu marka horiei erreklamazio-orriak, kexak edo iradokizunak helaraztera, bai eta jantziak itzultzera ere, marka horiek «arropa zikina» saltzen dutela argudiatuz; izan ere, «beren ekoizpen-katean ez dituzte ehungintzako langileen giza eskubideak bermatzen, ezta haien babesa ere».
«Kontsumitzaile gisa dugun eskubidea baliatu nahi dugu, ez baitugu erosi nahi fabriketan gutxieneko segurtasun baldintzekin fabrikatu dela ziurtatzen ez duen arroparik. Markei Nazioarteko Akordioa sina dezatela eskatzen diegu», adierazi du Iratxe Arteagoitia SETEM Hego Haizea GGKEko zuzendariak, General Alava kaleko Decathloneko atarian.
Halaber, salaketa kanpaina sare sozialetara ere zabalduko da. Arropa Garbia Kanpainari buruzko informazio guztia, oro har, eta, bereziki, Decathlon eta Tendam taldeari egindako erreklamazio-kanpainari buruzkoa, www.ropalimpia.org webgunean eta sare sozialetan dago eskuragarri.
Itxaropenezko erabakia Europako Parlamentuan
Gainera, Europako Parlamentuak Iraunkortasun Korporatiboan Behar Bezalako Arretari buruzko Zuzentaraua bozkatu eta onartu duen egun berean egin dute gaurko protesta. Arau horrek enpresek mundu osoko hornidura-kateetan giza eta lan eskubideak betetzeko duten erantzukizuna arautuko du. Helburua da enpresek beren balio-katean gertatzen den inpaktu negatiboa identifikatzea, prebenitzea, arintzea eta konpontzea.
Proposatutako legediak soilik Europako Batasunean aktibo dauden enpresa handienei eragingo die, baina SETEMk bere onarpenaren garrantzia azpimarratu du: «Rana Plazako tragedian galdutako bizitzak gogoratzen ditugun egunean, bozketa hau mugarri garrantzitsua da mundu osoko langileentzat, komunitateentzat eta aktibistentzat, eta urrats handia da enpresek kontuak emateko. Lehen aldiz, itxaropenezko eguna da gaurkoa».
