Gaur, apirilaren 24an, Bangladesh-eko Rana Plaza-ko tragedia gertatu zela 10 urte betetzen diren egunean, SETEMek eta Arropa Garbia Kanpainak ekintza aldarrikatzailea egin dugu Gasteizko Andre Maria Zuriaren plazan “Oroitzapenak hitzarmena eskatzen du. Levi’s, IKEA, Amazon eta Decathlon, sina ezazue Ehungintza Industriaren Segurtasunerako Akordioa” lelopean.
Biktimak gogoratzeko, olan handi bat jarri dugu plazan, Rana Plazako ehungintza fabrikan hil ziren pertsonen izenekin. “Ehungintza-langile ezezagunari omenaldia egingo diogu beren bizitza arriskuan jarrita eta soldata oso baxuak jasota gure arropa ekoizten duten emakume guztien sinbolo gisa”, esan du Iratxe Arteagoitiak, SETEM Hego Haizearen zuzendariak. Gainera, manifestu erreibindikatzailea irakurri eta minutu bateko isilunea egin da. Ekintza hori bera beste lau hiritan egin da aldi berean: Madril, Bartzelona, Iruña eta Granadan.
2013ko apirilaren 24an erori zen Rana Plaza Nazioarteko marketarako arropa ekoizten zuten 1.138 pertsona hil ziren. Eraikina erortzeko arriskuagatik aurreko egunean ebakuatu bazuten ere, hurrengo egunean lanera itzultzera behartu zituzten mehatxu eta erasopean. 2.000 pertsona baino gehiago zauritu ziren eta bi urteko kanpaina bizia behar izan zen enpresek biktimei eta familiei kalte-ordainak ordain ziezaieten.
RanaPlazaNeverAgain
“Ezinbestekoa da Rana Plaza-n gertatutako tragedia inoiz ez gertatzea berriro. Hala ere, ikusten ari gara enpresa batzuk beren produktuak kostu baxuarekin ekoizten jarraitzen dutela, pertsona asko hiltzeko arriskua egon arren”, esan du Arteagoitiak.
Horregatik, Levi’s, Decathlon, Amazon e IKEA markei Ehungintzako eta Jantzigintzako Segurtasun eta Osasunari buruzko Nazioarteko Akordioa sinatzea exijitzen diegu. 2021eko Nazioarteko Hitzarmen horrek eraikinen segurtasuna eta pertsonen osasuna kontuan hartzen ditu, eta 195 markak sinatu duten arren ehungintza-ekoizpen enpresa horiek ez dute sinatu oraindik. Levi’s enpresa, adibidez, Bangladesh eta Pakistaneko 60 fabrikatan baino gehiagotan hornitzen da.
Akordioa sinatuz gero, behartuta egongo lirateke ikuskatzaileei beren fabriketan sartzeko baimena ematera eta bertan lan egiten dutenen osasuna eta segurtasuna bermatzera. Horregatik, Arropa Garbia-k sinadurak batzeko nazioarteko kanpaina jarri du abian, haientzat lan egiten dutenen bizitza eta osasuna babestera presionatzeko. Eskaerahemen sina daiteke: https://ropalimpia.org/ranaplaza/
Espainiako Gobernuari egindako eskaerak
Kontuan hartuta ehungintzaren sektoreko ekoizpena deslokalizatuta dagoela, Arropa Garbia Kanpainak Espainiako Gobernuari eskatzen dio behar bezalako arreta izango duen lege lotesle bat sor dezala, moda-marken balio-kate osoan giza eskubideak eta ingurumena babestuko dituena eta haiek betetzen ez dituzten enpresak zigortuko dituena.
“Lege lotesle batek soilik behartu ditzake Europako enpresak beren jardueraren ondorio negatiboak saihestera eta pertsonengan eta ingurumenean eragiten duten inpaktuaz arduratzera”, dio Eva Kreisler-ek, Estatuko Arropa Garbia Kanpainaren bozeramaileak. Gure inguruko herrialde batzuek, besteak beste, Frantzia, Alemania eta Norvegiak horri buruzko legedia onartu dute jada. Europako Batzordea zuzentarau bat lantzen ari da enpresek beren mugetatik kanpo eragiten dituzten inpaktuen ardura har dezaten, baina atzerapen handiarekin ari da garatzen eta geldiarazteko edo “leuntzeko” arriskua dago, nazioarteko enpresen lobby indartsuaren eraginez.
Zure sinadura behar dugu markak Segurtasunerako Akordioa sina dezaten.
