Asaari Bibang handiak, Maria Cruickshank-ekin batera, zutik jarri du Zabalgana gizarte etxeko ekitaldi-aretoa, «Humor Negra» bakarrizketa apurtzailearekin. Ikuskizunaren ondoren, «Fabricando Mujeres: Indarkeria kontsumitzen dugu?» erakusketa interaktibo eta igarogarria inauguratu da, lehen bisita gidatuarekin.
Aurrera doa Balio Faktoriaren azarorako eta abendurako programa, kontsumoaren eta indarkeria matxisten inguruan. Asteazken honetan, abenduaren 4an, egun handia iritsi da, zikloko jarduera nagusiaren inaugurazio ofizialarekin: Fabricando Mujeres: Indarkeria kontsumitzen dugu? erakusketa interaktibo eta igarogarria; SETEM Hego Haizeak Altekio – Iniciativas hacia la sostenibilidad kooperatibarekin batera sortu du, ¿Consumimos violencia? ikerketetan eta Fabricando Mujeres dokuwebean oinarrituta.
Lehen bisita gidatuaren parte-hartzaileek bezala, erakusketa bisitatzen duen orok Emakumeen Fabrikaren unibertsoan murgiltzeko aukera izango du, euskaraz zein gaztelaniaz, hiru espaziotan barrena:
- Emakumeen Fabrika: gure eguneroko kontsumoan ezkutatzen diren indarkeria matxistak ikusaraziz.
- Auzokideen Patioa: emakumeek jasan dituzten indarkerien istorioak partekatzen dituzten auzokideen patioa zeharkatuz.
- Maiteren Lantegia: indarkeria matxistarik gabeko kontsumo baterako alternatibak modu kolektiboan sortuz.
Oraingoz, Gasteizko hiru gizarte-etxe bisitatuko ditu erakusketak, baina aurrerago espazio gehiagotara iritsiko da:
- Zabalgana GE: abenduaren 8ra
- Salburua GE: abenduaren 10etik 19ra + Abenduak 11: indarkeria matxistei eta kontsumoari buruzko tailera (izen-ematea) [gaztelaniaz]
- Hegoalde GE: abenduaren 21etik urtarrilaren 6ra
«Humor Negra», Asaari Bibang
Zalantzarik gabe, jarduera zikloaren plater nagusietako bat Asaari Bibangen bisita izan da. Zabalgana gizarte etxeko ekitaldi-aretoa Humor Negra bakarrizketa antirrazista eta afrofeministarekin bete zen. Jendez gainezka zegoen areto batean, eta Maria Cruickshank aktore oñatiarrak lagunduta, 1985ean Ekuatore Ginean jaiotako aktore, komiko, aurkezle, idazle, zutabegile eta aktibistak Espainian emakume, beltz eta migratzaile izatearen berezitasunez hitz egin zuen, lotsarik gabe, publiko gasteiztarra barrez leherraraziz eta hausnartzera biltzatuz.
Ikuskizunaren ondoren, Fabricando Mujeres: indarkeria kontsumitzen dugu? erakusketa ikusteko lehen bisita gidatua eskaini zuen SETEMek. Erakusketan izan ziren Asaari eta Maria ere, SETEMeko Hego Haizea taldearekin batera.
Balio Faktoria | Kontsumoaren eta indarkeria matxisten inguruko tailerra
Asaari Bibangen bisitaren ondoren, azarorako eta abendurako Balio Faktoria programak aurrera jarraitzen du. Alde batetik, Fabricando Mujeres: indarkeria kontsumitzen dugu? erakusketa interaktiboa bisita daiteke jada. Erakusketa Zabalgana gizarte etxean egongo da datorren astera arte, Salburua eta Hegoaldera joan aurretik.
Azkenik, zikloaren azken jarduera abenduaren 11n izango da: indarkeria matxistei eta kontsumoari buruzko tailerra, SETEM Hego Haizearen eskutik, 18:00etatik aurrera Salburua gizarte etxean. Azken jarduera hori doakoa da, baina parte hartzeko beharrezkoa da formulario honen bidez izena ematea.
